Թեկնածուական դիսերտացիան արտագրած գերմանացի նախարարը հրաժարական է տվել
15:11 • 01.03.11




Այսօր հրաժարական են տվել Գերմանիայի երկու նախարարներ՝ պաշտպանության նախարար Կառլ Թեոդոր ցու Գուտտենբերգը և ֆինանսների նախարար Վոլֆգանգ Շոյբլեն։ Այս մասին հաղորդում է Reuters-ը:

Փետրվարի կեսերին գերմանական ԶԼՄ-ները հաղորդում էին, որ ցու Գուտտենբերգը արտագրել է իրավաբանական գիտությունների թեկնածուի իր դիսերտացիան։ Նրա աշխատանքում հայտնաբերվել են առանձին պարբերություններ, որոնք առանց հղումների բառացիորեն մեջբերվում են այլ հեղինակներից։

«Սա իմ կյանքի ամենացավոտ պահերից է։ Ես միշտ պատրաստ եմ պայքարել, բայց հասել եմ իմ ուժերի գագաթնակետին»,- հայտարարել է ցու Գուտտենբերգը մամուլի ասուլիսին, որի ժամանակ հայտնել է իր որոշումը։


Սոցիոլոգների տվյալներով՝ Բունդեսվերի նախկին ղեկավարը ամենաշատ ժողովրդականություն վայելող գերմանացի քաղաքական գործիչներից մեկն է։ Նա սերում է հայտնի տոհմից և ունի բարոնի տիտղոս։ Ստեղծված իրավիճակում պաշտպանության նախարարին պաշտպանում էր կանցլեր Անգելա Մերկելը, որը հայտարարել է, որ ցու Գուտտենբերգին նշանակել է պաշտպանության նախարար ոչ թե նրա գիտական աստիճանի համար, այլ որպես մի մարդու, ով լավ է հասկանում իր գործը։

Ինչ վերաբերում է ֆինանսների նախարար Շոյբլեին, ապա նա պաշտոնավարում էր 2009թ.-ից և մինչ այդ պաշտոնը զբաղեցնելը եղել է ներքին գործերի նախարար։ Նրա հրաժարականի պատճառը չի նշվում։

__________________
bleib mal cool...