ԵՐԳ

Տեառն ՆԵՐՍԻՍԻ Շնորհալւոյ Հայոց Կաթուղիկոսի ողբերգութիւն անձին զղջացելոյ եւ բողոք իւրաքանչիւրոյ դիմի խոստովանաբար.

Աշխարհ ամենայն,
Առ իս նայեցեալ,
Ախտակից լերո’ւք:
Բանամ զշրթունս,
Բարբառիմ լեզուաւս,
Բողոքեմ զանձնէս:
Տէր, ողորմեա’. Տէր, ողորմեա’.
Տէր, ողորմեա’:
Գող եղէ մեղաց,
Գըտող կորստեան,
Գուբ ինձ փորեցի:
Դաւեցի զանձն իմ,
Դաւաճանեցի,
Դարան գործեցի:
Տէր, ողոր. Տէր, ողոր. Տէր, ողոր:
Երբեմն էի լոյս
Եւ այժմ եմ խաւար
Եւ ստուեր մահու:
Զիա±րդ պատմեցից
Զթիւ մեղաց իմոց,
Զի բազում են յոյժ:
Տէր, ողոր. Տէր, ողոր. Տէր, ողոր.
Էրկինք եւ երկիր,
Եկա’յք, ողբացէ’ք
Եղկելի զանձն իմ:
Ընտրեցի զչարն,
Ընկալայ կամաւ
Ըզհոյլս մեղաց:
Տէր, ողոր. Տէր, ողոր. Տէր, ողոր.
Թաթաւիմ տղմով,
Թաւալիմ ի մեղս,
Թօթափիլ չկարեմ:
Ժանդ ախտիւ լըցեալ,
Ժահահոտ եղէ
Ժամանակս բազումս:
Տէր, ողոր. Տէր, ողոր. Տէր, ողոր.
Ի բաց մեկնեցայ
Ի սուրբ խորհրդոց,
Ի բարեաց գործոց:
Լաւ վարկաւ անձն իմ,
Լուսոյն հեռանալ,
Լինիլ ընդ խաւար:
Տէր, ողոր. Տէր, ողոր. Տէր, ողոր.
Խորհուրդըք չարին
Խաբեն զհոգիս,
Խորասոյզ առնեն:
Ծածկեն անդընդօք,
Ծիծաղին գլորմամբս,
Ծանակ զիս առնեն:
Տէր, ողոր. Տէր, ողոր. Տէր, ողոր.
Կամաւ կորացայ,
Կարկամեալ անձամբ,
Կանգնիլ ո’չ կարեմ:
Հուր մեղաց կիզող,
Հրդեհեաց որ յիս,
Հոգեւոր բարիս:
Տէր, ողոր. Տէր, ողոր. Տէր, ողոր.
Ձաղկեցայ մեղօք,
Ձաղեցին տեսողքն,
Ձանձրացաւ հոգիս:
Ղեղի դառնութեան
Ղօղեալ ի սիրտ իմ,
Ղամպար իմ շիջաւ:
Տէր, ողոր. Տէր, ողոր. Տէր, ողոր.
Ճաշակմամբ մեղաց
Ճաշեցի զմահ,
Ճոխս աղքատացայ:
Մեռեալ եմ հոգւովս,
Մոլորեալ մտօքս,
Միայն կամ մարմնովս:
Տէր, ողոր. Տէր, ողոր. Տէր, ողոր.
Յորոգայթ մահու
Յորսողին անկայ,
Յաղթեցայ յախտից:
Նետից թշնամւոյն
Նշաւակ եղէ,
Նոր միշտ խոցոտիմ:
Տէր, ողոր. Տէր, ողոր. Տէր, ողոր.
Շուրջ պատեալ զինեւ
Շունք բազումք եղեն,
Շաղախին արեամբս:
Որս եղէ չարին,
Ուռկանաւ մեղաց
Որսացաւ անձն իմ:
Տէր, ողոր. Տէր, ողոր. Տէր, ողոր.
Չարաչար վշտօք
Չարչարի անձն իմ,
Չունիմ դադարումն:
Պարտապան գտայ
Պարտուց յանցանաց,
Պարտեալս ի մեղաց:
Տէր, ողոր. Տէր, ողոր. Տէր, ողոր.
Ջանամ զղջանալ,
Ջեռանիմ դարձեալ,
Ջեռնում հրով մեղաց:
Ռաբբի կոչեցայ,
Ռակայ անուանիմ
Ռամկական վարուքս:
Տէր, ողոր. Տէր, ողոր. Տէր, ողոր.
Սիրով ցանկութեան,
Սաստիկ բարկութեան,
Սիրտ իմ խոցեալ է:
Վիրօք յանցանաց
Վշտանայ հոգիս,
Վարանեալ շրջիմ:
Տէր, ողոր. Տէր, ողոր. Տէր, ողոր.
Տիրեցին ինձ չարք,
Տարագիր հանին
Տիրական գրկացն:
Րաբունւոյն բարւոյ
Րախճական ձայնին
Րոտինս ո’չ լուայ:
Տէր, ողոր. Տէր, ողոր. Տէր, ողոր.
Ցանկութիւն չարեաց
Ցանկալի դիմօք:
Ցաւեցոյց զաչս իմ:
Ւիւրաքանչիւրոց
Ւիւսմամբ խուռն ախտից,
Ւիւծեալ է հոգիս:
Տէր, ողոր. Տէր, ողոր. Տէր, ողոր.
Փութացի’ր, անձն իմ,
Փախչիլ ի չարեաց,
Փափագիլ բարեաց:
Քեզ միշտ մերձ ծանիր,
Քուն մահու եկեալ,
Քըննող դատաւոր:
Տէր, ողոր. Տէր, ողոր. Տէր, ողոր.
Սուրբ Աստուածածնին բարեխօսութեամբ.
Յիշեա’, Տէր, եւ ողորմեա’: